Gullkýrin mjólkuð

Alveg er það furðulegt hvað samfélag gyðinga getur ennþá mjólkað heimsbyggðina vegna helfararinnar. Vissulega var þetta viðurstyggilegt þjóðarmorð sem framið var á þessum þjóðfélagshópi og því ber aldrei að gleyma, ekki frekar en öðrum viðbjóðslegum glæpum gegn mannkyni sem framdir hafa verið gegnum tíðina. En oft finnst mér þessi fortíðarhyggja gyðinga ganga of langt.

Í fyrsta lagi láta gyðingar oft eins og þeir hafi verið þeir einu sem komu illa út úr seinni heimstyrjöldinni. Ekki má nú gleyma því að það voru fleiri minnihlutahópar sem einnig voru myrtir í unnvörpum á álíka hrottafenginn hátt og gyðingarnir. Til dæmis voru samkynhneigðir, geðfatlaðir og þroskaheftir myrtir. Þá frömdu Japanir viðurstyggilega glæpi gagnvart Kínverjum og myrtu milljónir þeirra, nauðguðu konum og börnum og pyntuðu fólk. Rússneskir, franskir, breskir og þýskir borgarar voru myrtir í unnvörpum í sprengjuregni eða af völdum siðlausra hermanna. Það komu ansi mörg lönd mjög illa út úr stríðinu. Í seinni tíð hafa svo enn fleiri fjöldamorð verið framin, t.d. á Afgönum, Kúrdum, Víetnömum, Palestínumönnum og svo nú nýlega Súdönum í Darfur. Engir af öllum þeim viðurstyggilegu stríðsglæpum sem framdir hafa verið gegnum tíðina hafa fengið brotabrot af þeirri athygli sem helför gyðinga fékk. Ekki eru þessir hópar að fá neinar skaðabætur fyrir fjárhagslegt sem líkamlegt tjón sem þeir hlutu í stríði.

Svo er nú hin "Guðs útvalda" gyðingaþjóð Ísraela, að sýna af sér engu betri háttsemi gagnvart Palestínumönnum en nasistarnir gerðu gagnvart þeim. Nú ætla ég ekki að leggja blessun mína yfir mörgum þeim árásum sem Palestínumenn hafa gert á ísraelsk börn og annað saklaust fólk, en ég hef samt samúð með þeim að vissu leyti. Frá seinni heimstyrjöldinni hafa þeir smám saman verið gerðir að aðskotahlut í sínu heimalandi (sjá þróun skiptingar lands milli Ísraela og Palestínumanna frá lokum heimstyrjaldar: http://blixx.files.wordpress.com/2007/02/landloss.jpg ). Í lok heimstyrjaldar kenndi heimsbyggðin svo í brjósti um gyðingana að þeim var afhent land í Palestínu til að byggja aftur upp ríki sitt (samkvæmt Biblíunni). Með tímanum rændu þeir meira og meira landi af þjóðinni sem bjó á svæðinu (svipað og Bandaríkjamenn gagnvart Indíánum á sínum tíma) og létu þá fá afmarkaða skika af lélegu landsvæði í staðinn. Auðvitað spratt upp ofbeldisfull andspyrnuhreyfing sem stundaði það að skiptast á hefndarárásum við hernámslið Ísraela. Á meðan Ísraelar hafa fjárstuðning frá Bandaríkjunum og víðar og geta keypt sér hátæknivædd vopn, þá neyðast Palestínumennirnir til að nota sjálfa sig sem sprengjubera. Á meðan gagnrýna hinir saklausu og"ofsóttu" gyðingar það hversu grimmir og vondir Palestínumennirnir séu að ráðast á sig. Þetta er svona svipað og að loka hund inni í litlu búri, svelta hann og pína í langan tíma og furða sig svo á því að hundurinn skuli bíta þegar honum gefst færi til.

Einhvernveginn get ég ímyndað mér að sumir sem þetta lesa útmáli mig sem gyðingahatara og þaðan af verra, enda er margt í þessum pistli mínum í andstöðu við pólitíska rétthugsun. Sú rétthugsun virðist oft gera ráð fyrir því að gyðingum sé frjálst að gera hvað sem þeim dettur í hug á kostnað annarra, af því að það var farið svo illa með þá í helförinni. Eins og staðan er í dag er þeim gyðingum óðum að fækka sem lifðu helförina og margir hverjir eiga einungis fjarskylda ættingja sem urðu fyrir barðinu á blóðþorsta nasista. Þannig að eldsneytið fyrir samúð heimsins, vegna löngu orðinna hluta, fer óðum að þrjóta. Gyðingar framtíðar þurfa því að finna sér aðrar leiðir til að mjólka styrki og skaðabætur út úr heimsbyggðinni.

Kannski mun sá dagur einhverntímann renna upp, er heimsbyggðin hættir að láta eins og gyðingar séu þeir einu sem hafi verið ofsóttir gegnum tíðina.

Fórnarlömbum helfarar greiddar bætur í Belgíu

Skrípaleikur olíufélaganna

Skrítið. Í hvert einasta skipti sem heimsmarkaðsverð hækkar, þá hækka olíufélögin sitt verð um leið. En hins vegar þegar heimsmarkaðsverðið lækkar, þá afsaka olíufélögin sig með því að þau eigi uppsafnaðar birgðir sem keyptar voru á hærra verði, og því lækka þau ekki næstum því strax. Eins þegar krónan hækkar gagnvart dollar, þá sjá olíufélögin ekki ástæðu til að lækka verðin, en hækka þau hins vegar um leið og krónan lækkar.

Já... við búum í æðislegu neytendaumhverfi, því er ekki að neita

Bensínið í 141,80 kr. og dísil í 149,80

Bölvað öfgatrúarpakk!

Ég er búinn að einsetja mér að sjá þessa mynd við fyrsta tækifæri. Maður er orðinn hundleiður á þessum bölvaða yfirgangi múslima yfir vestræn samfélög og þessa bölvuðu undirgefni okkar fyrir öllum dylgjum þessa hóps. Endalaust er maður að heyra dæmi af því hvernig stjórnvöld á vesturlöndum eru að setja boð og bönn við hinu og þessu til að þóknast trú einhvers hóps á aldagamla bókaskruddu. Meira að segja hér á landi er að finna svona undirgefni, t.d. Austurbæjarskóli sem tók svínakjöt af matseðli skólans af því að örfá börn í skólanum eru múslimar og mega ekki borða svínakjöt. Hvað í andskotanum á þetta að þýða?

En aftur um þessa blessuðu mynd. Menn eru hræddir við viðbrögðin og vilja þess vegna helst ekki að hún sé sýnd. Þeir sem hugsa svona eru að hvetja múslima til að koma með enn geðbilaðri kröfur. Við eigum ekki að þurfa að óttast afleiðingar af því að hylla okkar menningu, en múslimar eru mjög á móti frelsi okkar vesturlandabúa til athafna, skoðana og tjáningar. Við eigum bara að steita hnefann fram í þetta fólk og segja því að hundskast til að taka til í sínum eigin málum áður en það fer að gagnrýna aðra, en það er staðreynd að í alltof mörgum múslimaríkjum eru mannréttindi fótum troðin og fólkið kúgað.

Og já, þið megið alveg kalla mig fordómafullann ef þið viljið. Mér er sama. Ég er bara kominn með nóg af þessu helvítis trúarrugli.

Holland hækkar viðvörunarstig

Björgólfur Thor er líka þarna...

... hann er nú hvorki meira né minna en í 307. sæti. Ekki slæmt það. Minnir reyndar að hann hafi verið í 257. sæti á síðasta lista, þannig að það virðist sem hann sé eitthvað að lækka á fluginu karlinn. Lélegt hjá Moggamönnum að gleyma stráksanum hans Björgólfs Guðmundssonar.

UPPFÆRT. Moggamenn löguðu fréttina.

Warren Buffet ríkastur

Óheilbrigður vinnumarkaður að lagast?

Atvinnuástandið hér hefur upp á síðkastið verið óheilbrigt. Hér er of mikið framboð af atvinnu á meðan lítið framboð er af vinnuafli. Það er ójafnvægi sem myndast vegna þess að jafnvægislaun eru almennt of lág.

Ímyndum okkur vinnumarkaðinn sem graf. Á grafinu eru tvær skálínur sem skerast í miðju og mynda þannig X. Þetta eru lína eftirspurnar eftir vinnuafli annars vegar og lína framboðs hins vegar. Lóðrétti ás grafsins eru laun, meðan lárétti ásinn táknar vinnuafl. Sé grafið sett svona upp þá myndi eftirspurnarlínan líta svona út: \ og framboðslínan svona: /. Þetta þýðir að eftirspurn eftir vinnuafli lækkar í takt við hærri jafnvægislaun á meðan framboðslínan hækkar.

Á fullkomnum markaði væru jafnvægislaun í þeim punkti þar sem lína framboðs vinnuafls og lína eftirspurnar vinnuafls skerast. Í þeim punkti væri ekkert atvinnuleysi og engin ófyllt eftirspurn eftir vinnuafli. Hins vegar hafa kjarasamningar yfirleitt gert það að verkum að jafnvægislaun haldast hærri en þessi skurðpunktur og því hefur framboð á vinnuafli verið meira en eftirspurnin sem þýðir atvinnuleysi. Hins vegar ef jafnvægislaun færast neðar en skurðpunkturinn, þá er of mikil eftirspurn eftir vinnuafli (því lægri laun þýða að atvinnurekendur geta borgað fleirum og bætt við sig starfsfólki). Þetta er einmitt sú staða sem virðist vera uppi í dag. Eða næstum því.

Það sem ég á við, er að jafnvægislaunin eru orðin það lág að það fæst ekkert fólk í störfin, og í stað þess að hækka jafnvægislaunin, sem lögmálið um framboð og eftirspurn gerir ráð fyrir, þá flytja atvinnurekendur inn erlent vinnuafl sem er tilbúið að vinna á þessum lágu jafnvægislaunum. Þá erum við að tala um menn sem geta komist af með minna á mánuði en meðal Íslendingar, því ekki eru þessir menn, nema í stöku tilvikum, að sjá fyrir fjölskyldu hér á landi. Sumir eiga fjölskyldu erlendis sem þeir senda hluta launa sinna til, en þess ber að geta að það fólk býr við lægra verðlag en fjölskyldur á Íslandi og því þarf minna til að framfleyta þeim.

Ergo, það að flytja inn erlent vinnuafl í stórum stíl skekkir markaðinn með að halda jafnvægislaunum niðri og gerir það að verkum að hér er offramboð á atvinnu. Auðvitað er ekki út í hið erlenda vinnuafl að sakast, það gerir bara það sama og við myndum gera í þeirra stöðu. Hins vegar eru það atvinnurekendur sem ekki hafa séð sóma sinn í að hækka launin. Aðspurðir segja þeir að erfitt sé að borga hærri laun, því oft er reksturinn byggður á svo veikum grunni að tap myndi hljótast af honum.

Hér er mergurinn málsins. Of mörg fyrirtæki eru á Íslandi, alltof margir atvinnurekendur. Til dæmis má nefna allar matvöruverslanirnar, bensínstöðvarnar, fataverslanir, bankaútibú, byggingaverktaka o.s.frv., en í ansi mörgum tilfellum eru of mörg fyrirtæki í sömu starfsemi að bítast um sömu kúnnana sem gerir það að verkum að reksturinn verður óskilvirkur, alltof fyrirferðamikil yfirbygging og fáir viðskiptavinir, sem ýtir undir það að vörur þær og þjónusta sem þessi fyrirtæki selja verða dýrari fyrir vikið.

Áðan talaði ég um fullkominn markað þar sem ekkert atvinnuleysi fyrirfinnst. Það er útópía sem aldrei myndi ganga upp. Sama hversu gott ástand er á vinnumarkaði, þá mun alltaf fyrirfinnast atvinnuleysi. Til dæmis leitaratvinnuleysi, sem skapast þegar vinnuafl er á milli starfa, að leita að einhverju betra. Eins munu alltaf fyrirfinnast einstaklingar sem bara einfaldlega nenna ekki að vinna. Þess vegna bendir 1% atvinnuleysi (síðustu tölur á landsvísu) ekki endilega til þess að hér sé mjög gott ástand. Hér getur verið mikill skortur á vinnuafli og samt getur mælst 1% atvinnuleysi.

En þá að tengingu við fréttina. Nú virðist sem hluti vandamálsins sé að hverfa. Byggingaverktakar eru orðnir verkefnalausir og því hættir erlent vinnuafl og leitar til síns heimalands. Bankar eru að segja upp starfsfólki og víða er starfsstöðvum lokað. Óðum er að minnka framboð á atvinnu, á sama tíma og kjarasamningar gera ráð fyrir hækkunum jafnvægislauna. Það er bara vonandi að hér finnist eitthvað ásættanlegt jafnvægi sem ekki einkennist annað hvort af miklu atvinnuleysi eða miklum skorti á vinnuafli.

Pólverjar snúa í auknum mæli aftur heim

Hvað er að smá nekt?

Mér þykir vel mótaður nakinn kvenmannslíkami eitt af því fallegasta sem til er, ég skammast mín ekkert fyrir þá skoðun, enda engin ástæða til. Það er í eðli mannsins að laðast að vel mótuðum líkömum annarra einstaklinga (í flestum tilfellum af gagnstæðu kyni), en bæði kynin eru drifin áfram af einhverskonar duldu eðli sem leitast við að finna sér maka sem getur getið af sér sem hæfust afkvæmi, skipta þá útlit og líkamlegir burðir miklu. Þetta þekkjum við hjá öllum dýrategundum.

Til dæmis laðast karlmenn almennt af myndarlegum barmi og breiðum mjöðmum, því að þau útlitseinkenni benda til þess að konan sé með góða mjólkurkirtla og heppilegar mjaðmir til barnsburðar. Þá laðast konur almennt af karlmannlegum, sterkbyggðum og almennt líkamlega heilbrigðum karlmönnum, því í okkar dýpsta eðli táknar það að maðurinn sé vel til þess búinn að vernda fjölskylduna gegn óvinum og rándýrum, sem og hæfur til veiða og síðast en ekki síst líklegri til að geta af sér sterk afkvæmi. Svona er eðlið okkar. Það er því ekki skrítið að nekt hafi spilað stórt hlutverk í listasögu heimsins. Rekja má dæmi um nektarmyndir allt aftur til fornaldar er hellisbúar máluðu myndir af nöktum líkömum sem og útbjuggu sér styttur til að heiðra frjósemina.

En þá kemur að frekari þróun mannsins. Snemma á þróunarskeiðinu hafa menn byrjað að klæðast húðum annarra dýra, til að halda betur á sér hita og þar sem maðurinn þurfti að hreyfa sig mikið (til að veiða o.fl.) var ekki lengur heppilegt að hafa hlýjan feld og þess vegna þróaðist feldurinn smám saman úr því að þekja líkamann og til að þekja einungis höfuð og aðra viðkvæma líkamsparta t.d. kynfæri. Og vegna þess hve kynfæri og brjóst gegna miklu hlutverki í að fjölga sér og ala afkvæmin, þá gerðu mennirnir sér það snemma ljóst að leggja þyrfti sérstaka áherslu til að hylja þessa líkamsparta gegn kulda og öðrum áreitum. Sem sagt þessir líkamspartar voru ekki huldir vegna skammar eða þess að þessir líkamspartar væru eitthvað dónalegir, heldur einungis af praktískum ástæðum. Þessi dónamynd sem mannkynið hefur málað af kynfærum er einungis eitthvað sem til komið er vegna trúarbragða. Enda sér maður hvernig afstaða margra trúarbragða er til kynfæra, sum hver telja það rétt að afskræma getnaðarlimi drengja á meðan önnur afskræma kynfæri stúlkna. Sum samfélög eru svo miklar teprur að allt sem tengist nekt er álitið argasta klám (sem er á engan hátt það sama). Meira að segja er það álitið rangt í mörgum samfélögum að sinna eins náttúrulegum og fallegum hlut og að gefa barni brjóst. Þetta er fáránlegt!

Ég er langt frá því að vera talsmaður kláms, enda er þar oft um að ræða niðurlægingu á öðru kyninu sem mér finnst ekkert skylt eiga við kynlíf, þar sem báðir aðilar bera virðingu fyrir hvor öðrum. Auk þess er ég ekki að hvetja til þess að allir gangi um naktir, sbr. praktískar ástæður hér fyrir ofan. En það sem ég er hins vegar á móti er þegar samfélög sem telja sig siðmenntuð og frjálslynd, eru að ritskoða listaverk sem sýna nekt í fallegu ljósi (án nokkurs kláms) til þess eins að beygja sig undir óskir einhverra tepra sem enn eru fastar með hausinn í einhverjum hlægilegum draugasögum sem skrifaðar voru af misvitrum mönnum fyrir þúsundum ára.

Mynd af nakinni Venus bönnuð í lestum London

Sýnum samstöðu með frændum okkar

Ég legg til að hver og einn einasti fjölmiðill í þeim löndum er telja sig hafa tjáningar- og prentfrelsi taki sig til og birti skopmyndir af öllum helstu trúarleiðtogunum og níðist á þeim myndum trekk í trekk þar til búið er að koma þessum bölvuðu trúarofstækismönnum, hverrar trúar sem þeir kunna svosem að vera, í skilning um það að tjáningarfrelsi verði ekki barið niður vegna ótta við eitthvað sem stendur í aldagömlum bókarskruddum eða þess sem einhverjir misgáfulegir predikarar bulla útúr sér.

En varðandi þessi ungmenni í Danmörku, þá finnst mér athugunarvert að þetta eru að megninu til ungmenni sem alla tíð hafa búið í Danmörku og notið þeirra góðu lífskjara sem þar eru. Í stað þess að þakka sínum sæla fyrir að fá að búa í jafn friðsömu og umburðarlyndu landi (samanborið við múslimaríki eins og Saudi Arabíu, Íran, Súdan o.fl.), þá ræðst þetta fólk um götur, rænir, ruplar og kveikir í og hótar morðum vegna einhverra skopmynda sem þetta lið veit jafnvel ekki einu sinni af hverju það er að mótmæla. Það hrópar einhver að verið sé að ráðast á íslam og þar með alla múslima og þá grípur um sig múgæsing og í stað þess að senda kvörtunarbréf til fjölmiðla eða birta málefnalega gagnrýni, þá grípur fólk til glæpa og ofbeldis, sem auðvitað hvetur fjölmiðlana ennþá meir til að teikna myndir af þessum Múhameð.

Allavega skil ég vel þá afstöðu Dana að reyna að hefta stórfelldan innflutning fólks fólks sem þakkar fyrir gestrisnina með þessum hætti.

Íkveikjur og óspektir í Danmörku

Je ræt að þetta virki...

...Reykjavík er frekar sérstök höfuðborg. Hér er lélegt gatnaskipulag og enn lélegri almenningssamgöngur og af því að almenningssamgöngurnar eru lélegar (bæði langt að ganga að næstu strætóstoppistöð og eins er strætó mun lengur á leiðinni en einkabílar í flestum tilfellum), vill fólk ekki nota þær og því myndast ennþá meira álag á hið lélega gatnaskipulag. Hið lélega gatnaskipulag gerir það auk þess að verkum að fólk reynir að keyra sem stysta leið til sinnar vinnu, til að vera ekki allt of lengi á leiðinni, og því sé ég það almennt ekki virka að starfsmenn taki sig saman um að pikka hvern annan upp þvers og kruss útum allan bæ til að sameinast um bíla. Eins er vinnutími fólks misjafn, sumir hafa sveigjanlegan vinnutíma, og sumir vinna yfirvinnu en aðrir ekki og því getur verið mjög erfitt að samræma vinnutíma starfsmanna svo þeir geti sameinast um ferðir. Hér er líka skítakuldi mestan hluta ársins og hálka á götum og gangstéttum, svo ekki sé talað um brjálað rok, slyddu, regn, haglél og snjókomu með reglulegu millibili, þannig að ég öfunda ekki þær hugrökku/fífldjörfu sálir sem leggja það á sig að ferðast með reiðhjóli til vinnu. Síðast en ekki síst er einungis lítill hluti borgarbúa að vinna í raunhæfu göngufæri frá heimili sínu.

Semsagt, einkabíllinn hefur vinninginn enn sem komið er, og ég sé ekki fyrir mér svona bandarískt "carpool" kerfi nema í örfáum tilfellum.

Starfsmenn ferðist ekki einir í bíl

Það er ALLT krabbameinsvaldandi

Bölvuð vitleysa er þetta, á nú að fara að banna eitt af því sem gerir lífið þess vert að lifa því? Í hundruð þúsund ára hefur mannkynið nærst á rauðu kjöti og má leiða að því líkur að ein helsta ástæða þess að menn fóru að þróast frá öpunum á sínum tíma, sé sú að þeir fóru að éta kjöt, sem gaf af sér mun meira prótein og nauðsynleg næringarefni til að stuðla að framþróun heilans en plöntufæði þess tíma.

Ýmsir hafa einnig bent á mjólkurvörur sem krabbameinsvaldandi, þannig að rétt væri að banna allt kjöt og allar dýraafurðir eins og það leggur sig. Eins geta efni í fötum verið krabbameinsvaldandi, þannig að best væri fyrir okkur að vera bara allsberar grænmetisætur og lifa í dauðhreinsuðum hylkjum. En svo er ekki víst að það sé nóg, því ef það væri vandlega rannsakað, er ég viss um að hver einasta fæðutegund og hver einasta vara sem framleidd er í heiminum, lífrænt ræktuð eða ekki, sé á einhvern hátt krabbameinsvaldandi. Einnig getur það að anda stuðlað að auknum líkum á krabbameini, en maður andar að sér alls kyns óhollum rykögnum í hverjum andardrætti. Eins getur vatn sjálfsagt óbeint virkað hvetjandi á krabbameinsfrumur með einhverjum hætti, en nú þurfa krabbafrumur á vatni að halda til að fjölga sér og lifa, þetta þarf að rannsaka!

Þannig að það eina sem við getum gert til að sleppa 100% við krabbamein er að hætta að borða, drekka og auðvitað anda. Sem sagt, ef við erum dauð þá fáum við ekki krabbamein. Er það ekki framtíðin?

Bannfæra allt rautt kjöt

Áfram dýraverndunarsinnar... eða þannig

Já þeir eru alveg æðislega sniðugir þessir dönsku dýraverndunarsinnar, líkt og "starfsbræður" þeirra í Finnlandi hér um árið. Að sleppa þúsundum lítilla, krúttlegra og saklausra minnka frá vondum slátrurum með peningaglampa í augum, sem vilja bara fletta skinnunum af vesalings varnarlausu greyjunum. Hljómar mjög fallegt og hugljúft, en eins og hver sæmilega þenkjandi einstaklingur getur ímyndað sér er raunin önnur. Það sem þessir dýraverndunar-fábjánar gera sér ekki grein fyrir, er að þeir eru að valda hryðjuverki á náttúrunni í kring, því eins og margir vita eru minnkar óendanlega grimm rándýr sem víla það ekki fyrir sér að murrka lífið úr öllum smákvikindum sem þeir koma kjaftinum nálægt, og oft án þess að ætla sér beinlínis að éta bráðina. Vel er þekkt það fyrirbrigði hér á Íslandi þegar minnkur kemst í hænsnabú, en yfirleitt myrðir hann allar hænurnar en tekur svo kannski bara eina með sér í grenið sitt. Ekki bætir svo úr skák að minnkar fjölga sér með ógnarhraða og eru allnokkuð harðger kvikindi og alls ekki vitlausir, svo að þeir verða að ansi illvígri plágu í viðkvæmu lífríki. En að því gefnu að þessir dýraverndunarsinnar skeyti engu um önnur dýr en minnka (annars hefðu þeir nú ekki sleppt þeim út), þá voru þeir heldur ekki að gera minnkunum mikinn greiða, því ljóst er að yfirvöld í Danmörku munu beita öllum brögðum til að útrýma þeim og öllum þeirra afkvæmum til að vernda lífríkið og líklegt verður að telja að fleiri minnkar muni liggja í valnum þegar upp er staðið en þessir 5000 sem sleppt var. Þá kom einnig fram í fréttum að mikill fjöldi minnka hefði endað ævi sína á hraðbraut nokkurri sem liggur þarna skammt frá búinu. Ekki má svo gleyma þeirri staðreynd að þessir minnkar hafa alla tíð verið aldir upp í búrum og þekkja því ekki náttúruna né hafa nokkra reynslu af því að lifa af í grimmilegri náttúrunni.

Þannig að ég get ekki betur séð en að þeir aðilar sem þetta framkvæmdu hafi verið vanhugsandi fábjánar sem eru svo blindaðir af trú á það að öll dýr skuli vera frjáls, að þeir pæla ekkert í þeirri staðreynd að frelsi einnar dýrategundar getur bitnað á hundruðum annarra tegunda.

Skemmdarverk á dönsku minkabúi